Elorrio Udalaren ekimen solidarioa
Elorrio Udalak aho batez onartu du “Elorrio Palestinarekin” plataformaren proposamena, eta horren bidez, Palestinako herriari laguntza humanitarioa eskaintzeko borondatea adierazi du. Udalak Mundu Bat GKEaren laguntzaz 5.000 euroko ekarpen ekonomikoa mahai gainean jarri du, aurtengo aurrekontuetan jasota.
Gainera, plataformaren diru-bilketa kanpaina babesteko gonbita luzatu dio herritarrei, horrela elkarrekin ekimen solidario honetan parte hartzeko aukera izan dezaten. Kanpainaren helburua, herrian zuzenean lanean ari den gobernuz kanpoko erakunde baten bidez, laguntza humanitarioa bideratzea da.
Bilketa honen bidez lortutako diruarekin, emakumeen eta nekazarien elkarteak babestu, laguntza psikosoziala eskaini, eta elikadura-burujabetza sustatzen duten proiektuei lagunduko zaie. Udalak herritarren eta tokiko eragileen elkartasunaren garrantzia azpimarratu du, larrialdi humanitarioetan erantzuteko funtsezko gisa.
Diru-bilketa kanpaina oraindik zabalik dago, eta laguntza eman nahi duten herritarrek Laboral Kutxako honako kontu korrontean egin dezakete ekarpena: IBAN: ES92 3035 0003 49 0030060489, Elorrio Palestinarekin elkartearen izenean.
