Udalak mendi bien Plan Bereziak idazteko lehiaketa deitu du
Ermuko Udalak Mantxibar-Oterre eta Urko mendien eremuetan Plan Bereziak idazteko lehiaketa iragarri du. Gune natural hauek ingurumen- eta paisaia-balio handikoak dira, eta herritarrentzako aisialdi-eremu garrantzitsua osatzen dute.
Planok, udalerri honen Hiri Antolamenduko Plan Orokorraren (HAPO) markoan, bi espazioen babesa bermatzeko pauso garrantzitsu bat izateko asmoa dute; izan ere, plan horrek ingurune horiek babestu eta garapen espezifikoen bidez antolatzea aurreikusten du.
Rosi Cid Hirigintzako zinegotziak adierazi duenez, “Lizitazio honekin, gure herritarren ongizaterako eta udalerriaren oreka ekologikorako funtsezkoak diren bi eremuren etorkizuna blindatzeko prozesuari hasiera ematen diogu”. Alkateordeak nabarmendu du gobernu-taldeak iraunkortasunarekiko, espazioen erabilera publikoko eta natura-ingurunearen hobekuntzako konpromisoa duela.
Urko inguruaren babesa eta erregulazioa
Urkoko Plan Bereziaren helburu nagusia ingurune natural hau egonkor mantentzea izango da, udalerriko eremu goratu horretan jarduera bateraezinak saihesteko erregulazio argia ezarrita. Babesak Urko mendia eta Irumugarre ondoko tontorra hartuko ditu, paisaia- eta ingurumen-balioan arreta berezia jarriz.
Zinegotziak azpimarratu du, “Bermatu nahi dugu Urkok gaur egun dena izaten jarraitzea: gure paisaiaren sinboloa, herritarren topagunea eta etorkizuneko belaunaldientzat zaindu behar dugun altxor naturala”.
Mantxibar-Oterre aisialdiko eremu gisa egokitzea
Mantxibar-Oterreko Plan Bereziak, 2015eko HAPOn jada mugatua, gaur egun Eibar eta Ermuko bide-saihesbiekin eraldatutako eremua egokitzea ahalbidetuko du. Helburua herritarren erabilerarako lagatzea da, irabazi asmorik edo asmo eraikitzailerik gabe.
Cidek azaldu du, “Eraldaketa-prozesu garrantzitsu baten ondoren, herritarren bizi-kalitatea hobetzeko erabil daitekeen eta erabili behar den espazio batez ari gara, paseorako, elkartzeko eta aisialdi osasungarrirako gune gisa”.
Bi plan bereziak Euskadiko Ingurumen Administrazioaren Legean ezarritako prozedurari egokituko zaizkio, ingurumen-adierazpenaren dokumentua barne, ikuspegi zorrotza eta parte-hartzailea bermatuz bi proiektuen garapenean.
Ekimen honekin, Ermuko Udalak hiri-eredu orekatu baten aldeko apustua egiten jarraitzen du, garapena eta ingurunearen babesa uztartuz, herritarrek kalitatezko espazio publikoez gozatzeko duten eskubidea errespetatuz.